Berisha i trembet përjashtimit nga Parlamenti dhe kërkon revolta në shtator, u bën thirrje qytetarëve të ngrihen për rrëzimin sa më shpejt të qeverisë

0
142

Pushtetari i rangut të parë non grata nga SHBA Sali Berisha duket se i trembet një skenari të mundshëm për ta nxjerrë jashtë loje në Parlamentin e ri. Ai këmbëngul se nuk e lë mandatin, por shanset që KQZ ta përjashtojë apo që PD ta largojë nga grupi i saj janë shumë të mëdha.

Ambasada amerikane e ka bërë të qartë se ai nuk duhet të jetë në Parlament si deputet i PD dhe mësohet se Basha do të mbajë një qëndrim zyrtar në shtator mbi fatin e ish-kryeministrit. Por duket se ky i fundit ka nisur të trembet nga surprizat që mund të vijnë dhe ka hedhur në fushë “letrën” e revoltave.

Edhe pse Parlamenti nuk ka filluar mirë, Berisha dje u ka bërë thirrje demokratëve që të bëhen bashkë për të rrëzuar qeverinë. Duke reaguar për vrasjen në Lushnje ku u ekzekutua një 34-vjeçar, Berisha është shprehur se vendi qeveriset nga bandat prandaj duhet të ngrihen qytetarët për përmbysjen e qeverisë.

“Duke dënuar me ashpërsinë më të madhe këtë gjendje dramatike në Lushnje dhe mbarë vendin ju bëj thirrje qytetarëve të ngrihemi fuqishëm për përmbysjen sa më parë të pushtetit të drogës, dhunës, vrasjeve dhe vjedhjeve”, shprehet Berisha. Ai po ashtu tha se kryeministri Edi Rama ka lidhje me këto banda agresive, të cilat sipas tij e kanë bërë Shqipërinë një mbrojtëse të krimit të pushtetarëve.

“Miq, Lushnja, qytetarët e saj të mirë, punëtorë dhe të ndershëm këto vite ndodhen nën sundimin e bandave me agresive të vendit të lidhura direkt me Kreun e Meduzës. Por de facto sot Shqipëria është narko shteti i vetëm në Europë pra një protektorat i mirëfilltë i krimit në pushtet”, tha ish-kryeministri.

Ultimatumet e Kim

Kujtojmë se ambasadorja e Shteteve të Bashkuara të Amerikës, Yuri Kim deri më tani ka dhënë një sërë ultimatumesh të forta ndaj Partisë Demokratike dhe kreut të saj sa i takon hyrjes së Berishës në Parlament. Kim në një deklaratë drejtuar PD-së u shpreh se do të ishte tragjike nëse partia do të hante bar vetëm për një deputet duke iu referuar kështu Berishës.

“Dëshiroj të theksoj rëndësinë që ndërsa kryetarët e partive do të futen në Kuvend, është e rëndësishme që të mund të shoqërohen nga deputetë që vërtet e meritojnë përfaqësimin e Shqipërisë. PD-ja ka luajtur një rol të pazëvendësueshëm për ta nxjerrë këtë vend nga komunizmi.

Në fakt, do të ishte një ironi historike, por edhe tragjike nëse partia do të duhej të hante bar për hatër të një deputeti të saj”, është shprehur Kim. Po ashtu edhe me anë të një editorial të publikuar në faqen e ambasadës amerikane, Kim i kërkoi kryeministrit Edi Rama dhe kreut të PD Lulzim Basha të kontrollojnë listat.

Sipas Kim, si Basha ashtu dhe Rama duhet të bëjnë kontrolle në lista për t’u siguruar se ata që do të hyjnë në Parlament janë përfaqësues të denjë të popullit. “Do të kërkoj që Edi Rama, Lulzim Basha, si dhe udhëheqës të tjerë të kontrollojnë listat edhe njëherë për t’u siguruar që kur të kthehen në parlament, njerëzit të mund të jenë krenarë për përfaqësuesit e tyre”, është shprehur ajo.